Rev 6 | SWP | STEP | Hinage ea ita, Mamoe buka aba‐guduna esega ie soe, na ginauri maumauridi hasi wa taudi esau ie riba, arinana doha palepalele, i ene, “U laoma!”

Revelation of John 6

Buka wa aba‐gududi se soedi, esau to esau.

1 Hinage ea ita, Mamoe buka aba‐guduna esega ie soe, na ginauri maumauridi hasi wa taudi esau ie riba, arinana doha palepalele, i ene, “U laoma!” 2 Abo ea ita, hosi posiposina esau, taugeruina nimana eai pidu; korona se mosei to i pesa bena eanua i ialaidi eo iala eai ana waiunu i saepoidi.

3 Buka aba‐guduna helebuina ie soe, abo wau ginauri maumauridi hasi wa, taudi helabuina ie riba, i ene, “U laoma!” 4 Abo hosi esau i pesama, i buiabuia lolo; taugeruina ana paisosa se mosei bena tanoubu eai loni i abihai i laehesuara, bena se haihai‐unuuioidi; elepa lailaina ia se mosei.

5 Buka aba‐guduna hehaionana ie soe, ginauri maumauridi taudi hehaionana arinana ea ataiei i ene, “U laoma!” Abo ea italau na ne, hosi dubadubana ea iita; taugeruina nimana eai aba‐nonoi i bahebahei; 6 doha arina esau ea ataiei, ginauri maumauridi hasi wa boeadi eai i laoma, i ene, “Falawa nonoina esega maisana pene esega, bali nonoina haiona maisana pene esega, na eausi eo waina tabu au hebaaeadi!”

7 Abo buka aba‐guduna hehasina ie soe, ginauri maumaurina hehasina arinana ea ataiei i ene, “U laoma!” 8 Abo ea italau na ne, hosi ana ao i baaea eo i eogeyoge, taugeruina esana ede Mate, dagelana eai Hade i hemuhemuriwatai; tanoubu se soi hehasi, lausoisoina esega se tore nimadi eai bena gigiboridi eai se tanuagaei, eo se aiunu, edi aba‐aiunu ede alahia eai, eo huia guriam eai, eo asiebo heaheawadi eai, eo tanoubu ta suisuidi hemahemanabaradi eai.

9 Buka aba‐guduna hehaligigina ie soe, abo abaaitalasam ubuna eai tatao earuadi ea itadi, isi gamagaridi wa Eaubada ena riba debana eai se unuidi, eo edi mauri se ribahemasarahaei debana eai; 10 arina lailai eai se dou si ene, “O Tanuagamai e, tabuna eo mamohoina, huiana ta’i i loha, abo nige u hekiraino osinamai debana eai, eo enamai u abigum tanoubu ta taumiana aridi eai?” 11 Abo esau, esau, lulu posiposi se mosei, se heribadi sora huia kuukuuna se aiyawasi, i lau e heledi tauheaheari, eo headi sora abo se unuidi doha isi, edi huia se heohidi.

12 Buka aba‐guduna hehaligigi‐esegana ie soe, ea italau na ne, moniinii lailaina i oitagu; mahana i lau i dubaduba doha lulu‐baeki, nawalai i hemala doha osina, 13 eo galewa iporadi se taru‐dobi tanoubu eai doha kuhou oeagina eai kuhou idaidaidi se uru, taba mana lailai oeagi wa i oiluiluini; 14 galewa i tauyamui doha pepa‐uriuri se nouhai se torehesuara, oea tupidi eo bonabonarua edi abatoro eai se oihesuaralaedi hari tupo eai. 15 Abotai tanoubu wasawasadi gamagaridi, eo dodoga saesaedi, eo iala kapena bagubagunadi, eo gogo lailai tataodi, eo tatao adidiri, eo tau‐auau eo tauiarihai tataodi, gamagaridi se bawayamui we’u duhadi eai eo oea‐tupi we’udi eai, 16 abo se awanorilau we’u eo oea‐tupidi aridi eai si ene, “Taba au beuma potamai eai, taba au puruyamuimai ia matana eai, ia wa terona eai i babawa wa, eo Mamoe ena ouyalayala eai. 17 Paana edi ouyalayala asubenana saesaena i laomao, eai abo abina i ata i totoro?”